Accessibility links

Breaking News

بعفويتهم... أمنيات أطفال سوريين في العام الجديد


أطفال سوريون في الأردن/وكالة الصحافة الفرنسية

الأردن – إعداد صالح قشطة:

محمد غزالة، 16 سنة، من حمص

بتمنى نرجع على سورية بعد ما تتحرر من الإرهاب، وبتمنى يعم السلام على كل العالم.

محمد عشموطي، 14 سنة، من حمص

بالسنة الجديدة ما بتمنى غير إرجع على حياتي القديمة بسورية، ونعيش متل ما كنّا بالأول، اشتقت لبيتنا ونفسي إرجع صلحو من أول وجديد.

داليا حسونة، 13 سنة، من درعا

كتير بحلم إني إرجع لدرعا وشوف بيتي وصديقاتي، بس كمان بحلم يتحسن وضع بابا وضل هون بالأردن لأني بحب معلماتي وصديقاتي وقرايبي وخايفة نفترق متل ما افترقت عن صديقاتي بدرعا.

وسام محمد، 16 سنة، من حمص

بتمنى بالعام الجديد إنه ترجع سورية وتصير متل قبل وأحسن، ومشتاقة ترجع الاحتفالات بأعياد الميلاد وترجع البهجة لسورية، ويكون فيها أمان وما يعود فيها تحرش بالفتيات. وهون بالأردن بتمنى يصير عنا بيت حلو متل بيتنا بسورية، وكمان بتمنى إدرس وإتعلم لغات وسافر هالسنة! وعندي كمان أمنية بفضل ما إحكيها.

شاهر السيد، 12 سنة، من الغوطة

بحلم إرجع سورية لنعيش ببيتنا، وشوف صديقي طارق، وإشتري له لعبة سيارة جديدة، لأني لما كنا صغار كسرتلو سيارتو وزعل كتير عليها وبكى وخاصمني، وبعدها قامت الحرب وافترقنا وبعدو زعلان مني.

وائل محمد، 16 سنة، من حمص

أمنيتي الوحيدة يكون عندي كاميرا، أنا كتير بحب التصوير، وبتمنى صير مصور مشهور.

مرح زينة، 16 سنة، من حمص

بتمنى يرجع الأمن والأمان وشوف أبي المفقود بسورية، وأمنيتي كمل علم بمدارس منيحة، وبتمنى صير ممثلة مشهورة، ويا ريت يجيبولنا وفود من العالم يعلمونا التمثيل!

صالح حافظ، 9 سنوات، من بلدة سرمين

بتمنى يكون عندي بالسنة الجديدة آيباد جديد مشان نزل عليه كل الألعاب، وبتمنى إكبر بسرعة مشان إشتغل وساعد بابا وماما بالمصروف.

قاسم محمد، 15 سنة، من حي عشيري

ما عندي أمنية محددة، بس كل شي بتمناه إنو يرجع الأمان لبلدنا، وبتمنى إرجع لمدرستي، بصراحة ما بدي إتمنى شي عشان أنا فاقد الأمل. بس بشكل عام بتمنى صير ممثل كوميدي متل غوار الطوشة!

إبراهيم عبود، 15 سنة، من كفر عايا

بتمنى يكون السلام بكل البلدان، وما يكون في قتل وظلم، وبتمنى أسافر على كندا بالعام الجديد، بسمع إنها آمنة، وبتمنى إبني بيت وإشتري سيارة ويكون إلى شركة خاصة بسورية وما إشتغل عند حدا!

يمكنكم التواصل معنا وإرسال الفيديوهات والصور لموقعنا عبر تطبيق “واتساب” على الرقم 0012022773659

التعليقات

XS
SM
MD
LG