صح محتاج للمادة، بس عندي عزة نفس وكرامة، وهذا أهم شيء عند الإنسان.
اسمي علي أمير محمد رضا الشلاه، مواليدي 1981، من سكنة منطقة (مصطفى راغب) بالحلة، ما متزوج، والدي متوفي، فقط عايش أني وأمي.
صار لي عشرين سنة، أشتغل بهذي الشغلة، أجمع مخلفات محلات تجارية، وشكو شيء بالشارع أخذه.
ما مرتبط بالبلدية، أوقات عملي أكثرها بالليل، باليوم أحصل عشرة آلاف أو أكثر، بس مو كل الأوقات أحصل فلوس، فأضطر إلى أفتش بالزبالة، وأعزل الأشياء الصالحة من الموزينة، أستفيد منها ثاني يوم.
أشياء ثمينة ألكاها، مثل فلوس، ذهب، مرات، أخذها وأسلمها للناس بالجامع، لأن أشوف حرام واحد يأخذ أشياء ما تخصه، صح محتاج للمادة، بس عندي عزة نفس وكرامة، وهذا أهم شيء عند الإنسان.
بابل - أحمد الحسناوي
