اسمي عمار قاسم، عمري ٢٣ عاما، آني من بغداد وأسكن في مدينة أربيل.
مرت علينه أيام صعبة عرفتنه شنو يعني تهجير وشلون يجبرك تترك كلشي تحبه وتعلقت بي وراك، مع هذا آني اعتمدت على نفسي وحققت طموحي وتخرجت من كلية الإعلام.
من صارت الأزمة بالموصل والناس انهزمت من داعش وسكنت بالمخيمات، تذكرت الأيام الصعبة اللي مرت بينه وشلون كنا محتاجين أي شخص حتى يساعدنه، لذلك قررت أساعد النازحين.
شاركت في أكثر من فريق تطوعي وقدمنا مساعدات ووجبات طعام للعائلات الي كانت تهرب من داعش أثناء عمليات تحرير الموصل والنازحين بالمخيمات.
صحيح أرجع للبيت تعبان ومرهق بس أكون فرحان جدا لأني مسحت دمعة طفل أو ساعدت محتاج، وهذا هدفي بالحياة.
أربيل ـ صفاء المنصور
