رغم المشاكل اللي تواجهنا، إحنه مصرين على تحقيق هدف واحد عدنا هو تشكيل فريق رياضي بسباق الدراجات الهوائية..
اسمي حسين عبد مسلم، عمري 15 سنة، طالب في الصف الأول متوسط، من سكنة منطقة آل بشارة، التابعة لناحية القاسم جنوب محافظة بابل.
إحنه مجموعة أصدقاء بمنطقتنا، نطلع كل يوم العصر، نسوي سباق دراجات هوائية، وهاي هوايتنا.
بس المشكلة ما عدنه طريق خاص بالسباق، إلا هذا الطريق العام، وتعرف سيارات خاف نتعرض لحادث.
الدراجة الهوائية بالنسبة إلي ولجماعتي، نعتبرها مستقبل، لأن هي هم رياضة، ونتمنى نتطور بعد وبعد، بس إمكانيتنا على كد حالنا، ورغم المشاكل اللي تواجهنا، إحنه مصرين على تحقيق هدف واحد عدنا هو تشكيل فريق رياضي بسباق الدراجات الهوائية، وما كو شيء صعب.
بابل ـ أحمد الحسناوي
