اسمي احمد الشنكالي من أهالي الموصل – سنجار، بعد ما دخل داعش للموصل نزحت إلى بغداد.
كان عندي موهبة النحت بس موهبتي ما كانت مصقولة. تبنتني المنظمة السامية لشؤون اللاجئين ودربتني لحد ما تعلمت أساسيات النحت.
رحت للمتحف المتجول الثقافي في بناية القشلة وشوفتهم أعمالي وطلبت منهم مكان حتى أعرض أعمالي ووافقوا.
بعد هالخطوة كدرت أقف على رجلي وصار عندي عملي الخاص اللي يسد شوي من حاجتي وبنفس الوقت هو هوايتي وشغفي، والفضل لأهل بغداد على دعمهم لي وللنازحين وللمواهب.
بغداد – أسامة الزين
تسع شهور حمل بطفل تجيبه للدنيا بألف كوة وتعب ويكبر بالنذور من هالتايهات والوكت الأغبر ومدرسة وأكل وشرب ولبس ومرض ودوا ومليون قل هو الله أحد علما يكبر ويصير شاب... تكول اي ابني كبر راح يعيني وفجأة تجي ايد غريبة تأخذه مني ويدكون باب بيتي ويكولولي "حجية كريمة خلص راح مات ابنك"! وهاي مو المصيبة الأولى... جانت أول صدمة الي من جابوا خبر بنتي مستشهدة بتفجير إرهابي بمنطقة حي اور من جانت رايحة للسوك، مفجرين السوك وتخبلت لما كدرت اتجاوز الصدمة وأكمل حياتي لباقي ولدي. مطول سنة واستشهد ابني الثاني بتفجير إرهابي بالحلة! انسدت الدنيا بوجهي وحسيت خلص راح كلشي وراحت حتى ضحكتي ومظل للحياة طعم بس جان مصبرني ولدي ورجلي ليل ونهار يواسوني وبسنة 2007 انخطف زوجي وما رجع منه خبر وذاك يوم وهذا يوم ومن ساعتها آني نذرت ولدي الثنين ضد الإرهاب لأن اعتبر نفسي أكثر عراقية تضررت. ولدي حاليا بالشرطة الاتحادية واحد منهم بالموصل والثاني بالزعفرانية. فإذا آني ما أضحى وأقدم ولدي منو يضحي؟ بغداد – مصطفى نادر
