أريد يكون هناك اهتمام حكومي ودولي لصيانتها والحفاظ عليها وأريد من الناس تتعرف على آثارنا وتراثنا..
آني صادق محمد رضا من محافظة بابل. هوايتي صناعة نماذج مصغرات البنايات التراثية والأثرية.
أركز على هيج نوع من البنايات حتى أسلط الضوء عليها وعلى أهميتها، خاصة بعد ما شفت جزء من آثار العراق مهملة وجزء منها دمرها داعش.
أريد يكون هناك اهتمام حكومي ودولي لصيانتها والحفاظ عليها وأريد من الناس تتعرف على آثارنا وتراثنا.
بغداد – أسامة زين
تسع شهور حمل بطفل تجيبه للدنيا بألف كوة وتعب ويكبر بالنذور من هالتايهات والوكت الأغبر ومدرسة وأكل وشرب ولبس ومرض ودوا ومليون قل هو الله أحد علما يكبر ويصير شاب... تكول اي ابني كبر راح يعيني وفجأة تجي ايد غريبة تأخذه مني ويدكون باب بيتي ويكولولي "حجية كريمة خلص راح مات ابنك"! وهاي مو المصيبة الأولى... جانت أول صدمة الي من جابوا خبر بنتي مستشهدة بتفجير إرهابي بمنطقة حي اور من جانت رايحة للسوك، مفجرين السوك وتخبلت لما كدرت اتجاوز الصدمة وأكمل حياتي لباقي ولدي. مطول سنة واستشهد ابني الثاني بتفجير إرهابي بالحلة! انسدت الدنيا بوجهي وحسيت خلص راح كلشي وراحت حتى ضحكتي ومظل للحياة طعم بس جان مصبرني ولدي ورجلي ليل ونهار يواسوني وبسنة 2007 انخطف زوجي وما رجع منه خبر وذاك يوم وهذا يوم ومن ساعتها آني نذرت ولدي الثنين ضد الإرهاب لأن اعتبر نفسي أكثر عراقية تضررت. ولدي حاليا بالشرطة الاتحادية واحد منهم بالموصل والثاني بالزعفرانية. فإذا آني ما أضحى وأقدم ولدي منو يضحي؟ بغداد – مصطفى نادر
