آني رجال عملي ما أحب الكعدة بالبيت، إذا اكعد بالبيت بلا عمل يمكن أموت، ولأن ماكو شغل فاشتغلت بالبقالة..
اسمي عبد الرزاق عبد الوهاب، أسكن بغداد، عندي ثلاثة أولاد وخمس بنات. أعمل في بيع الخضراوات والفواكه منذ عام 2004، بالضبط من طلعت تقاعد من العسكرية، جنت عسكري مشاة.
آني رجال عملي ما أحب الكعدة بالبيت، إذا اكعد بالبيت بلا عمل يمكن أموت، ولأن ماكو شغل فاشتغلت بالبقالة، ولو شغلة بيع الخضراوات والفواكه مو مثل الأول، شغلة تعبانة ماكو سحب السوك فارغ من الأوادم مثل (ناكوط الحب) كل نصف ساعة يجينا واحد حتى يشتري.
منطقة الأعظمية انترست دوارة أصحاب عربات المخضر، تشوفهم من الصبح يفترون بالشوارع والدربونات ويدكون الأبواب يبيعون مخضر والنسوان تكيف عليهم لأن حارة الدنيا وما بيهن حيل يجن للسوك وهمين لأن يبيعون (طكه ناقص) يعني أرخص من عدنا أحنا جماعة المحلات بالسوك.
والله آني كل شهر اذبلي فوك المليون دينار هيجي خسارات على المخضر التالف والاي يبقى لأن ماكو شرايه، لكن شسوي.. أكول بس المهم أحرك نفسي ما أظل كاعد بالبيت ولو آني ممحتاج فلوس.
بغداد - دعاء يوسف
