آني أبو رسل، أشتغل بتصليح الأجهزة الكهربائية وبيعها مثل الخلاطات والمبردات ومولدات الكهرباء يعني شكو أجهزة منزلية آني أصلحها.
هذا مو شغلي صراحة، آني كنت نائب ضابط عسكري وطلعت تقاعد واشتغلت بالبداية ببيع وشراء مولدات الطاقة الكهربائية بعدين اشتغلت على البالات – بيع المستعمل من الأجهزة الكهربائية – فصار عندي خبرة بتصليح الأجهزة الكهربائية يعني تعلمت الشغلة.
الناس تفضل أسوي صيانة وتصليح للأجهزة الكهربائية القديمة لأن نوعياتها كلش زينة وأصلية، لهذا نشوفها تبحث عن بالات الأجهزة الكهربائية لأن كلها -تكمه وقوية – وعمرها طويل واشكد مصلحها تبقى عبالك جديدة، مو مثل الأجهزة هسه التارسه السوك بسرعة تعطل وفلوس تصليحها أتكلف أكثر من فلوس تشتري الجديد منها.
الناس بالعراق ملت من المو زين من الأجهزة ومن كل شيء، فرجعت هسه للقديم وطلعته وكامت تصلح بي لأن تعبت من الغش والكذب، لأن الجديد أو الحديث من الأجهزة الكهربائية بس شكل حلو وبهرجه تغري الواحد للشراء وهو خاوي ما بي فائدة وميطول استخدامه يعطل بسرعة.
بغداد - دعاء يوسف
